每日向女兒匯報行蹤

絲絲有次見佢聽完電話，即刻笑到見牙唔見眼，原來個女Check緊佢做啲乜。陳總多年來都同屋企分隔兩地，個女同老婆喺上海，佢自己一個人一半時間喺香港，另一半時間為咗工作要四圍飛，搞到無晒時間陪屋企人，好彩佢囡囡每日都會打幾個電話畀佢，先報告吓自己嗰日有乜事發生，再問爸爸喺邊度做緊乜，個女仲要求佢每次出差或有乜嘢行程變更都要率先打電話報告吓。陳總仲話，有時老婆都唔知佢喺邊，反而要問番個女。

為咗多啲時間陪老婆同埋個女，陳總就接咗佢哋嚟香港，個女家陣讀緊國際學校，仲適應緊，但一家人無論喺邊，都係喺埋一齊好啲，睇見佢就幸福。

絲絲諗起另一位喺中石油做嘅朋友，佢都曾經為咗一家團聚接個仔嚟香港一齊住，但個仔係北京人好難適應香港環境，成日都好唔開心，最後都係返咗北京生活，呢位朋友惟有長期兩地飛。其實家陣香港嘅中資機構有好多係內地派駐香港嘅員工，佢哋長期都係過住啲兩地飛嘅生活，都幾慘㗎。

余絲韻