大市狂升兩個多月後，熱錢流入速度減慢咗，加上基金大戶齊齊轉炒股仔，令啲大藍籌無咩動力，雖然大落後嘅中移（00941）昨日一度發力支撐大市，但恒指最終都要回吐426點收市，回吐幅度雖然唔算太大，但對市場氣氛有一定打擊，最明顯係上午本來炒到㷫合合嘅股仔，本來都唔多理個市升跌，但尾市見個大市跌得急，部分鑊鏟友都先行計數離場，還好是市場承接力十足，部分股仔仍能企喺高位收市。
呢幾日股仔愈炒愈細粒，幾粒神都唔係最受歡迎，毫幾子股最好炒。反而之前蚊蚊聲啲二三線股，炒咗上去全部坐定定。好似之前由兩個幾起步，直炒上3.75元的蒙古能源（00276），上月發盈警後，股價回落至3.3-3.5元之間橫行整固，但又一味跌唔落。
古晨聽講蒙能遲吓會搞次英雄宴，廣邀芬佬再睇睇公司前景，通常搞得咁大台戲，股價表現實唔會差。趁未開車買番些少，博炒番上5蚊都幾和味。
古晨