本文重點
近排樓價不斷上升，買家嘅入市信心亦加強不少，部分更加「即睇即買」，美聯嘅代理老友樊志聰就同Vincent講，一名青衣藍澄灣業主介紹朋友去該盤睇樓，佢朋友睇樓個陣仲帶埋一班朋友去幫吓眼，點知其中兩個朋友同時畀樓盤吸引住，決定即時入市，最後三個人齊齊榮升做藍澄灣業主，連環成交帶動呢個屋苑喺今個月短短8日已經有12宗成交。
Vincent仲八到，三個單位都係面積957呎嘅3房戶，其中1座中低層E室就賣咗310萬元，呎價3,239元。另一個成交單位係1座中低層E室，成交價295萬元，呎價3,083元。至於仲有一個單位係3座中低層D室，以296萬元轉手，呎價約3,093元。
港置上月百萬分行16間
近排新盤銷情暢旺，香港置業行政總裁李志成同Vincent講，佢哋上個月錄得16間百萬分行，已經係連續四個月錄到雙位數字，其中貝沙灣分行高級區域經理夏笑笑奪得2百萬分行美譽。另外，地產代理監管局見市旺，派出署理行政總裁黃維豐會晤六大地產代理公司管理層，要求各代理巨頭訓示旗下從業員，在推銷新盤時不可對消費者作出失實陳述，並需確保一手樓銷售秩序及遵守地監局的推銷及宣傳一手盤指引。另外該局今年暫接獲11宗代理失實陳述一手樓盤資料的投訴，去年全年則有23宗。
（Vincent Lau）