本文重點
依家經濟唔好，大家都想慳啲使，但如果講到做善事，絲絲相信好多香港人一樣都會出錢又出力。就好似花旗香港為咗做善事，一班管理層捐出咗佢哋嘅收藏品，連清朝古董都有，認真矜貴！
好多企業都會用唔同方法籌款做善事，今次原來已經係花旗香港○九年第二次嘅員工籌款活動，管理層一共捐咗30件珍藏品出嚟，由尋日起嘅兩個禮拜內，員工可透過電郵出價參與網上拍賣。
30件收藏品唔嘢小
呢批收藏品都唔嘢小㗎，有貓王皮禮士利喺一九七○年出嘅經典Single黑膠碟，又有限量版嘅可樂汽水罐、京奧紀念版郵票、鑲滿廿幾粒鑽石嘅心口針，仲有古董茶几連椅，據聞張茶几面嘅石，係清朝嘉慶年間嘅古董，絲絲估呢件拍賣品都可以賣到好高價。
30件珍藏來自唔同嘅管理層，相信好多高層包括花旗香港環球個人銀行服務行政總裁及總經理盧韋柏都有份參與。但其實絲絲最想知道，係邊位管理層拍賣自家製蛋糕，的確好有心思，而且絲絲相信，能夠拎得出嚟拍賣，呢個管理層整嘅蛋糕都一定好有水準，包保投到嘅員工會食到唔停口。拍賣所得嘅款項，會捐畀東華三院嘅老人服務，的確好有意義！
余絲韻