如果聯繫匯率要變，港元應該貶值定係升值呢？我哋試吓用「巨無霸指數」（Big Mac Index）嚟分析，今年一月全球33個地區中，港元價值被低估52%，而最被低估嘅貨幣係馬來西亞幣（Ringgit），幅度達57%；最被高估嘅係挪威克朗（Kroner），幅度達63%。港元貶值空間唔多，但升值空間可以好大。
物價量度升跌空間
根據購買力平價（PPP）理論，不同地區一籃子產品和服務嘅價格長遠應趨向一致。《經濟學人》廿幾年前開始周圍比較「麥記」巨無霸嘅售價，編製出「巨無霸指數」，以了解貨幣被低估或高估嘅程度。
○四年佢哋整咗星巴克「中杯鮮奶咖啡指數」（Tall Latte Index），當年「巨無霸指數」反映港元被低估45%，但「中杯鮮奶咖啡指數」就認為港元被高估15%。
呢類指數只針對單一商品，售價好睇經營者喺唔同市場嘅競爭力等，有人話將問題過分簡單化，但諾貝爾經濟學獎得主炒股係咪一定贏錢？「菜欄族」（師奶股民）就一定輸錢？近排唔少外幣升到嘭嘭聲，Baby就試吓用「巨無霸指數」嚟睇吓外匯走勢。
假設巨無霸售價不變，根據上周五主要貨幣兌美元匯價（歐元1.39、英鎊1.58、日圓94、澳元0.78及紐元0.61），發現英鎊及歐元分別被高估約2%及34%，澳元、紐元及日圓就分別被低估24%、15%及13%。
英鎊仍被嚴重低估
再比較去年七月（雷曼未爆煲時）和今年一月官方「巨無霸指數」，大部分貨幣唔算太偏離，唯一係英鎊依家仍相對被嚴重低估，再升並唔出奇。
（Baby）