恒指上周曾兩度失守17,000點關口，一周收報17,062點，升1.62%。其實今個五月恒指已升近10%，升到咁直頭係拆咗傳統智慧「Sell in May and go away」嘅招牌。唔少人用過唔同方法研究Sell in May係咪好嘅買賣策略，但點解要Sell in May，就仲未有足夠說服力解釋呢個美股傳統智慧嘅答案，不過喺中國古籍反而搵到似是而非嘅答案。
技術分析呈回落訊號
讀書時老師話端午節係紀念戰國時代愛國詩人屈原，但近年已有人提出新意見。例如學者聞一多喺著作《端午考》話，端午節係古代吳越民族祭祀龍嘅活動。又有資料話「端午」原本叫「端五」，因為先秦人認為「五」字不祥，仲叫五月五日為「惡月惡日」，大不吉利，佢哋認為疾病係惡魔鬼神附身，所以喺瘟疫高峰期前辟邪，而賽龍舟係因為古人認為船係送走災邪嘅工具，當然愈快愈好。據講去到漢朝，端午節先變成係紀念屈原。
農曆五月真係咁邪？我統計過去10年農曆五月嘅恒指表現，結果係五升五跌，最差係去年跌近11%，最好係○七年升約11%，10年平均升1.57%，唔算差喎。唔玩迷信，其實我一直提醒要小心港股「急升忽跌」，其實恒指上到17,000點後動力弱咗好多，睇技術分析，恒指失守10天平均線，RSI、MACD同STC都有回落訊號。
基金經理話熱錢少咗
美林亞太區股票結構性產品部副總裁黃書耀又畀咗個恒指牛熊證街貨分布圖我睇，佢話：「依家同恒指上次萬六點時好唔同，唔再係街貨一面倒累積喺熊證，依家牛證同熊證街貨比例相對上次平均。如果大市再向下，預計牛證街貨仲會升。」吓，咪即係股友終於轉軚，你又會點解讀群眾智慧呢？
相反，好友話依家係資金市，有熱錢支持加上低息環境，港股會再上。我上周同一位歐資行嘅基金經理食飯，佢教咗我點理解資金流向，言談間仲解開港股「疫市」上升之謎。呢位「芬佬」話：「其實基金經理資金來源只有兩個，一係客人投資嘅新錢，一係組合內揸嘅現金。」咁基金經理近排係咪積極入市呀？「講真，基金經理幾時都係揸咁上下嘅現金水平，都係透過沽貨買貨調動資金，除非有新錢入嚟先會多咗錢使。」點解咁多熱錢嚟香港？「同一道理，每隻基金都規定投資邊個區域，例如一定要投資亞太區嘅，見到區內其他市場唔及港股，啲資金就嚟香港。其實恒指萬五、萬六點真係好多資金流入，升到萬七點後，資金少咗好多喇。」
24%股友升市仍輸錢
前幾日見到有網友話：「由萬一忍到萬三，由萬三忍到萬五，由萬五忍到萬七，忍無可忍終於入市。」今次《東方產經》網上民意調查問股友，恒指收市終升破牛熊分界線，今次升浪你贏定輸？截至上周末晚上6時，有56%人話贏錢，24%人話輸錢，亦有20%人話平手。
輸錢唔緊要，最緊要你有決心做「Comeback Kid」，跌低要爬番起身。由專研「交易心理學」嘅心理學家Brett Steenbarger主理個Blog《TraderFeed》，提到「輸錢的藝術」5條法則係：（一）不要在一宗交易輸掉無法在一個上午追回的資金；（二）不要在早上輸掉無法在一日內追回的資金；（三）不要在一日輸掉無法在一周追回的資金；（四）不要在一周輸掉無法在一個月追回的資金；（五）不要在一個月輸掉無法在一年追回的資金。Brett Steenbarger話，經歷失敗後重生係健康交易心理，但切忌輸到翻唔到身。
豬流感（H1N1甲型流感）威脅仍在，你哋落魚缸㩒機時有無高度戒備？股友報料話，耀才證券依家要探熱先可入場，仲有口罩供應。佢哋有同事話，兩個幾星期前開始任何人入公司都要先探熱，發燒就會被勸喻離開，但暫時未有「勸退」個案，股友亦好合作，目的都係想保障大家健康，所以公司日日都消毒。如果你知道有其他魚缸都咁細心，不如話聲我知等我表揚吓。
（大健）
若然有料想報畀大健或有嘢問，可電郵money.biz@opg.com.hk。