港股上周五表現反覆，恒指最終險守萬七又死唔去，反而早幾日炒到甩轆嘅股仔，喺周末前要抖抖氣。對於港股後市去向，唔少人都認為唔跌得幾多，尤其係美元面臨貶值危機，為對抗通脹，更加要買資產等升值。話晒買股票靈活過買樓，有乜唔對路，隨時可以跳車，古晨都認為買股抗通脹，好過買樓抗通脹。
不過，港股升越萬七之後，上升動力大減，喺入場風險愈來愈高的情況下，古晨選股都係保守些少好。公路股喺今次反彈浪中，一直大落後，寧滬高速（00177）呢個月都無乜點行過，見過5.89元高位後，近日反覆回落至5.3元橫行。以其資產淨值計算，現股價仍有12%的折讓，而公司一直有龐大現金流，股息率更高達5厘之上，在銀行再減存款利率至接近零息後，寧滬高速這類息率高而低風險的公用股，應能吸引大批厭惡風險的保守投資者。
古晨