本文重點
今次美元真係玩完喇。上星期四隻鎊可以跌300點之後拗腰倒升，我就好似未見過喇，上星期喺1.3795沽咗一手歐元，開頭見佢跌極都唔落，所以後來見佢跌到1.37六十幾，見有30點執，平咗佢算數。
不過，衰在見隻鎊由低位彈咗百幾點，於是喺1.56廿幾沽咗一手，結果就揩咗200幾點。因為當晚隻鎊破頂，突破1.58，所以決定止蝕。因為無論喺咩情況或者咩時間，匯價破頂或者穿底都係一個好強嘅突破訊號，逆緊市嘅就算唔反手都要離場。
英鎊吼1.57揸番
好多人會認為個市升幾多或者跌幾多都會行番轉頭，但如果轉咗行單邊市，只會出現輕微調整，而且匯價破頂穿底實會觸發止蝕盤，你唔止蝕大把人止蝕，個價就會繼續行，愈行就愈多盤止蝕，你可以想像一下，唔止蝕嘅話，情況可以壞到點。上星期五冇咩大改變，下晝美元反彈過一浸之後又跌過，雖然夜晚我都喺1.3980沽咗一手歐元，但都擺咗個止蝕盤喺1.41齊頭，只係博佢試番1.39邊，之後我會等隻鎊回番去1.5700附近再揸過。
蘇小妹