雖然恒指連續第二日出現回吐，不過全日上落波幅只係250點，一眾毫子以及仙股依然係市場上的熱炒對象，好似二十大升幅榜中，好多都係陌生面孔，可想而知，細價股炒風係何等熾熱！
講番股份，受惠內地再傳六月份將再有鼓勵汽車消費信貸和支持汽車金融公司發展的相關政策出台，所以汽車股表現不俗，東風汽車（00489）尋日就再升8.49%，收報7.15元，仲升破埋52周新高添。而金價上揚，亦令到一眾金礦股備受市場追捧。
尋日中央財政部及發改委聯手發布「關於開展節能產品惠民工程的通知」，決定安排專項資金，以財政補貼方式支持推廣使用高效節能產品，相信此舉有助節能空調的推出，大家不妨留意相關股份。
此外，內地財政部有指，截至四月一日止，其公共投資預算累計下達4,035億元人民幣，已完成預算的44.4%，大力拉動恢復經濟增長。由於公共投資中，重點為基礎建設身上，故認基建股今年第二季表現將可為大家帶來一點驚喜㗎。
（小尾）