本文重點
已停牌多時嘅精優藥業控股（00858）尋日發出通告，要追認有關○四年收購醫藥業務嘅交易。吓？依家已經係○九年，何解要追認番5年前嘅交易？話說公司當年呢單收購，只當係須予披露交易，但實情係交易嘅賣方Ong Cheng Heang及Wu Kiet Ming，係買方公司董事何晉昊嘅女婿及媳婦。
應要求追認及批准
根據《上市規則》，關連人士嘅定義包括董事嘅女婿及媳婦，換言之有關交易須受《上市規則》中對關連交易嘅要求所限制，即係要受相關申報、公布及獨立股東批准等要求所限制。講到呢度，大家都應該明白，點解公司要追認番當年呢單交易。公司已應港交所要求，將再舉行股東特別大會，尋求獨立股東對○四年收購作出追認及批准。公司已就此成立獨立董事委員會就交易進行評估，獨立董事委員會經考慮獨立財務顧問意見後，認為交易屬公平合理。當年嘅交易涉及約7,300萬元，主要係收購一公司嘅51%權益，收購嘅公司從事藥品生產及出售等。
余絲韻