本文重點
金融海嘯下，唔少公司都要減薪裁員，不過喺去年上市嘅A8電媒（00800）就相反，今年唔止請多咗40個大學生，仲趁住今日係公司成立9周年嘅大日子，實行同成班員工「開P」兼包起戲院畀員工睇新戲添！
朝早開P直落睇夜場
尋日係A8上市後第一次開股東周年大會，而今日就係公司成立9周年，首席財務官何曄笑笑口咁同絲絲講，公司去年成功上市而且業績唔錯，老闆劉曉松就決定同一班員工慶祝吓，由朝早開始開Party慶祝，再直落到夜晚包起兩間戲院，請大家睇由童星原島大地同埋國寶熊貓主演嘅《熊貓回家路》！
見到劉老闆咁錫員工，絲絲梗係戥佢哋開心啦，但何曄同絲絲講，公司對股東其實一樣咁好，除咗搞好盤生意外，第日仲會諗多啲方法回饋股東。絲絲心諗，A8搞手機音樂下載搞得有聲有色，近年喺內地仲幫手搞咗唔少演唱會，下次不妨考慮搞大啲，包場請股東睇演唱會都唔錯吖！
余絲韻