本文重點
因為近期介入電盈（00008）私有化分拆股票官司而狀態大勇嘅證監會，適逢今日慶祝20周年紀念，肯定會有大搞作以壯聲勢，鐵定出席慶祝會嘅嘉賓都算陣容鼎盛，除咗天大面子請嚟諾貝爾經濟學獎得主克魯格曼外，幾乎歷任證監會主席、副主席都會到齊，包括第一任主席區偉賢、第三任主席梁定邦、第四任主席沈聯濤及現任主席方正，曾任副主席嘅史美倫亦會出席。數嚟數去，好似漏咗第二任主席羅德滔，聽講佢就未能出席。
戴維森來港捧場
更出位嘅係，今次盛會仲邀得因八七年股災而撰寫戴維森報告書嘅主角Ian Hay Davision嚟捧場，至於當日有份協助戴維森寫報告，今日成為英倫銀行副行長嘅Paul Tucker亦會嚟祝賀。
唔講唔知，克魯格曼來港，畀錢入場聽佢演講固然收費貴，但一早已賣晒枱，本來演講冇預到傳媒，有關方面幾經辛苦至同佢嘅經理人爭取到今晚安排另一間房畀傳媒現場收看，呢位仁兄都算巴閉。
余絲韻