本文重點
中銀香港（02388）周年股東大會（AGM）表面上好平靜，但內裏其實暗藏怨氣。有癡心長情嘅小股東話，要賣走佢由上市就揸咁耐嘅中銀股票，又話管理層表現僅僅合格，令佢好失望。雷曼迷債苦主大聯盟召集人陳光譽都親自踩場，不過最後都係摸門釘！
小股東決心「分手」
小股東陸先生話，管理層完全畀唔到佢知中銀以後嘅業務方向，問題多多，加上仲要無息派，惟有唔再感情用事，沽走由上市就開始揸嘅中銀股票。陳光譽喺現場好勞氣，佢話明明得到股東授權出席，質詢班管理層點解雷曼迷債處理手法咁封閉。不過中銀話中央證券無確認到佢嘅授權，故拒絕佢入場，陳光譽最後惟有搵埋班苦主繼續示威。
管理層表現唔多好，總裁和廣北仲「借埋聾耳陳隻耳」，對小股東嘅發問經常話「聽不清楚」，搞到小股東即刻雙語廣播，講完廣東話又講國語。每位出席嘅小股東雖獲贈換糉優惠券，但絲絲認為，怒氣係食幾多隻糉都補唔番嘅，大會出年不如請番個即時傳譯，等小股東發言都唔使再窒窒吓。
余絲韻