本文重點
滙控（00005）呢一年畀人鬧得好厲害，做得好唔好就見仁見智，唔少傳媒朋友都好鍾意搵番啲滙豐舊大班傾偈，睇吓佢哋點睇依家嘅管理層。不過中國人有句說話「不在其位，不謀其事」，又唔會「說三道四」，雖然好多滙豐舊大班都係外國人，但佢哋都有咁嘅諗法，好似施德論咁，尋日就唔肯評論前僱主，淨係話自己都係股東，好同情啲小股東喎。
施德論帶領滙豐經歷回歸，佢喺九六至九八年出任香港上海滙豐銀行嘅主席，雖然依家已差唔多70歲，但仍然健步如飛，聲如洪鐘，而且仲公職多多，退而不休。雖然佢講起滙豐就三緘其口，但講起專長嘅資訊科技就如數家珍。
慨嘆IT提高「毒產」滲透
佢除咗係數碼港管理公司主席之外，仲係香港互聯網註冊管理公司嘅主席。唔講唔知，原來我哋依家成日用嘅網上銀行，施德論當年喺滙豐就係負責呢樣嘢，不過嗰陣時當然無依家保安咁好，多部機仔畀個密碼你，佢笑笑口話嗰陣網上銀行有兩個密碼，一個係常設密碼，另一個就要每次登入嘅時候改，下次再登入就要入新嘅密碼。
對於依家啲銀行備受有毒資產困擾，佢都慨嘆資訊科技令呢類產品嘅滲透性更大，否則好難每日做咁多交易。
余絲韻