美股隔晚高開低收，恒指昨日再考驗250日線，國指更失萬點關。雖然大市腳仔軟，但股仔炒作仍然熱鬧，更有創板股勁升近兩倍，炒鬼無有怕，最怕係市靜無得玩。古晨尋日推介南海石油（00076），勝在細細粒，容易食，吸引唔少炒家入場，刺激股價再升近一成。
不過，炒股仔切忌坐貨，要炒得夠靈活，既然南海石油連升三日，已錄得可觀升幅，又係時候換換炒作對象。
和成國際（00651）日前公布建議將股份50合1，另每手交易由2萬股改為5,000股。但凡股仔合股，難免令缸邊友對其起戒心，最怕係無良大股東，合完股後又再掟貨，搞到股價再有機會跌九成，舊有小股東所持舊貨真係一文不值。消息公布後，股價一直進行整固，在1.4仙樓下徘徊。尋日見和成重現鑊氣，成交額更大增至16.3億股，股價急升7.1%，高收1.5仙，睇嚟可以跟風炒番轉。
古晨