下周三期貨場結算，古勝預計呢兩日魚缸走勢更波動，不過就算淡友有本事殺番落去16,300點上周低位，以上月底現貨場收市價15,520點計數，好友仍然贏成條街。
大笨象（00005）盤中跌逾3%，散場報收66.2元，跌2.5%，古勝執筆時，萊斯銀行喺米字旗魚缸插水，因為未能再配股集資，大笨象亦受累，較本地魚缸散場價再跌逾2%。缸湖傳聞祖國移動（00941）入股遠傳交易受阻，股價跌1.1%，報收73.75元。雖然祖移已表示有信心交易可成功，但係啱啱公布最新上客數字增幅放緩，在下預咗佢股價受壓。
另一指數重磅股港交所（00388），報收113.4元，跌1.5%，跌幅尚算溫和，古勝講過港交所可以話係指數溫度計，若然港交所死唔去，魚缸亦唔跌得去邊。
通脹重臨磚頭有價
大笨象突然減息，香江又進入零息年代，超人昨日表示，低息環境將引到「通脹怪獸」發惡。若然通脹重臨，磚頭價一定飛天，難怪近日樓價急急腳追番魚缸步伐，除咗係熱錢流入，主要係低息引發用家入市。不過，超人已提醒，無論買股或買樓，都係要量力而為，呢句幾時都啱聽。
中信泰富（00267）年初時，因管理層炒燶澳元Q仔，幾乎搞到公司一鋪清袋，醜聞曝光，高層大地震，股價亦曾狂插水至3.66元年內低位。呢排澳元狂升，中信泰富股價亦跟住狂升，唔覺唔覺尋日一度升越16元，報收15.92元，逆市升5%。古勝真係要講句關佢鬼事，皆因之前中信泰富阿媽出手打救，一炮過買起輸到嘔血的澳元Q仔，就算家陣澳元狂升，都係阿媽贏大鑊，中信泰富根本無着數。不過，缸邊友憧憬阿媽為人為到底，應該會注番三兩個優質項目畀中信泰富，所以股價狂升亦有道理。
鑽井需求料可回升
「油魔」呢期精神爽利，加上受惠祖國石化產業振興規劃細則出爐，而大行又幫手唱好，近日石油股大勇，急升過後昨日見回吐，但石油服務股接力，中海油服（02883）昨逆市上升，升破8元，報收8.07元。自祖國宣布要致力增加成品油儲備，中海油服業務前景一片亮麗，得到唔少芬佬捧場，股價持續上升。
集團管理層較早前宣布，今年大部分定單已獲得確認，加上中海油（00883）已落實未來兩年積極擴產，中海油服生意真係唔憂做。雖然鑽井船的日費率及裝備使用率下降，一直是市場關注的問題，但近日油價回升，問題已迎刃而解。去年第四季，各石油企業均大幅削減資本開支，令中海油服該季盈利僅得3.5億元。幸而在市場信心逐步恢復之下，預期由次季開始中海油服的業績會得到顯著改善。
古勝