尋日滙控（00005）同恒生（00011）齊齊宣布首季分別派息8美仙以及1元，在公布前曾為兩股帶來一定憧憬。不過，尋日最具焦點的藍籌股，必定係港交所（00388），皆因佢終於都可以做番紅底股，全日升2.76%，收報100.4元。
雖然尋日大部分股份都回落，但資金並無離開個市場，只係轉戰到其他板塊上，如環保能源股，皆因內地有消息指，國家快將公布對環保能源企業的的振興計劃細則，故市場憧憬屆時將又有一番炒作，相關股份如中國風電（00182）、陽光能源（00757）等都有不俗表現，可繼續留意。
至於港股方面，尋日雖然高開低收，但升勢仍未停止，並且連續第四個交易日上升，累積升幅達1,875點。不過，大市好淡爭持局面亦都愈加激烈，相信本周內將有一個定局，大家要拭目以待！不過，正所謂「一個酸梅兩個核」，雖然日前恒指最終都能衝破16,000點關口，但係似乎上證指數就無乜力上破2,600點，所以短期相信再有機會下調，要留意啦。
（小尾）