本文重點
近日股市無懼豬流感（H1N1甲型流感）大發神威，投資者確實始料不及。有卜架報料，話唔少散戶喺五‧一假前沽貨或者揸熊證，結果係點唔使多講。即使尋日恒指大漲小回，散戶亦唔敢追貨，有貨都趕緊沽貨離場。究竟呢鋪係咪相反理論，飛甩晒班「魚仔」後，大市會再一飛沖天，惟有做事後孔明！
「另類指標」分析大市
正當散戶們心緒不寧，財經專家嘅「心靈雞湯」自然大派用場。講開又講，早前本欄提及，某熟悉術數嘅財經專家即將轉工，如今經已成事，相信大家亦都估到，呢位就係人稱「沈大師」嘅沈振盈。原來沈大師已喺上月底正式離開英皇證券，重返舊舖訊匯證券出任行政總裁。
正所謂「人逢喜事精神爽」，沈大師履新後，會唔會又有真知灼見，指點迷津，讀者不妨留意逢周一本報刊登沈大師嘅「另類指標」，以作參考。
余絲韻