本文重點
豬流感（H1N1甲型流感）雖然未如預期般肆虐，但都係小心駛得萬年船。金管局尋日就開始將員工分流，分開兩個辦公室返工，就算一邊唔好彩中招，都有另一邊頂住，做法一如當年沙士時期。
啟動鰂魚涌辦公室
金管上周已出咗通函畀銀行，叫佢哋要就豬流感有應變計劃，好似提高衞生情況、準備定啲口罩，仲有係萬一有乜事，要有第二梯隊頂上。金管尋日已啟動咗鰂魚涌嘅辦公室，仲喺每個唔同部門入邊，抽咗啲同事過去嗰邊返工，其餘同事就留番喺國金二期，萬一唔好彩有一邊受流感襲擊，另一邊同事都可繼續返工。
喺○三年沙士時，金管都用過呢一招，今次照辦煮碗，目的都係未雨綢繆，冇事發生當然最好。
金管作為監管本港金融命脈嘅機構，當然乜都要先知先覺，行快人哋一步啦，適時作出應變措施確係一個好榜樣。
余絲韻