本文重點
正忙於應付已故華懋集團主席龔如心千億遺產案嘅陳振聰，突然喺聯交所披露四月二十九日增持咗佢做大股東嘅宏霸（00802）股份，有老友急Call絲絲，好奇Tony（陳之洋名）耗費巨資打官司，點解仲會突然增持宏霸，連公司多名董事都有增持，唔通宏霸有好消息跟尾？
以股代息表示信心
後來絲絲查到，其實宏霸四月六日出咗以股代息公布，所有股東可按比例選擇要股唔要錢。
條方程式係Tony陳持股6,200萬股，乘以每股股息0.165元，除番當時參考市值6.75元，正正就係佢今次披露增持咗嘅約151萬股嘞，令佢最新持股去到約6,351萬股，相等於25.05%股權。
近期股市反彈，宏霸股價嚴重落後，尋日仲微跌3仙至5.99元，如果Tony收現金，可攞番1,023萬元，以現價夠佢買番170萬股有突，不過佢同眾董事選擇收股，無非都係想表示對公司嘅信心啫。
余絲韻