本文重點
雷曼迷債搞到一鑊泡，被指係雷曼迷債設計者及始作俑者嘅新鴻基投資管理行政總裁李建平，尋日出席另類投資管理協會（AIMA）香港分會活動時，由於係佢喺雷曼「爆煲」後首次出席記者會，自然被問到呢個敏感話題。
兩、三年後可能出書
李建平初時都封嘴唔講迷債，話呢個係AIMA活動，唔方便講其他嘢，不過大家梗係唔肯就咁罷休，等佢完咗成個活動後再追問。佢見大家咁有耐性，都回應咗幾句，佢話「謠言止於智者」，佢坦承喺事件中承受一定壓力，但問到事件中有無雷曼迷債投資者向佢示威時，佢就答話冇，仲話咁咪係智者囉。
佢仲透露待事件平息，可能喺兩、三年後，佢會講番整件事件嘅始末，到時更有可能出書添。絲絲就諗，佢真係有諗頭，本書肯定好多人爭住買，單係噱頭就已夠晒啦！
佢又話，自己唔會因為呢件事刻意低調。其實雷曼都唔係乜嘢禁區，尋日佢講對沖基金時，都有提到雷曼「爆煲」後，涉及嘅交易對手、對沖基金等都係受害者。
佢直言今次金融海嘯係銀行危機，銀行至係始作俑者，又話對沖基金唔怕下跌市（Falling market），最怕係失效市場（Failing market），好彩依家市場運作逐步恢復正常。
余絲韻