前日喺1.3280沽咗一手歐元，好彩走得快，我見佢跌到1.32十幾廿幾之後彈番上，最後喺1.3234止賺。隻鎊仲強，前日趁英國冇市一路調整，雖然我諗住隻鎊星期二先至會行啦，但見佢跌到1.48三十幾又係跌唔落，開頭都唔為意，到夜晚紐約開埋市之後，珍妮花打嚟話隻鎊上番1.49，我先至細心考慮，最後喺1.4923揸番隻鎊，結果夜晚破埋day high，仲升上1.50，但我只係見到1.5008個高位，我唔想冒過市風險，所以喺1.4988止賺。
尋日朝望吓幅圖，原來隻鎊收高喺1.50樓上，尋日仲喺亞洲早市升到1.5047，但十一點幾又跌返去1.50十幾，之後見佢喺1.4980至1.5010反覆咗好耐，十二點喺1.50邊企穩，所以決定追揸番。其中一個原因係英國星期一休市，但外圍股市繼續升，所以我估英股復市後會追番，隻鎊都會強，加上隻鎊試完1.50之後沽壓唔大，結果下晝英國公布嘅四月份建築業PMI好過預期，隻鎊挾上1.51，但我就喺1.5088止賺。
蘇小妹