本文重點
三大內地電訊商嘅老總去年一方面要搞重組，一方面又要為雪災、地震善後，真係好辛苦，但人工就唔成正比。根據三公司嘅年報顯示，三位老總去年都無人工加，聯通（00762）董事長常小兵更加要減人工近5%，得番213萬元人仔，連同其他獎金，全年總收入係329.5萬元人仔，無咗30%。
但常總已經算好，皆因佢兩位行家仲慘，舊年賺逾千億元嘅中移（00941），董事長王建宙基本人工連花紅只有183.2萬元，雖然無被減薪，但佢唔單只帶領中移跑贏內地同業，中移去年盈利更係冠絕全球，但佢連埋獎金總收入都只得314.6萬元，唔係好成正比。至於中電信（00728）董事長王曉初仲慳家，舊年薪酬只有32.4萬元人仔，連埋其他獎金，總收入得189萬元人仔，成為最慳家嘅電訊業老總。
TVB「財子」削薪300萬
講開人工，電視廣播（TVB，00511）上載嘅年報披露，佢哋○七年最高薪嘅管理層舊年被大減人工，由750萬至800萬元嘅組別跌落500萬至550萬元嘅組別，即係年薪最多無咗成300萬元，但無寫明係邊位高管，大家見到志雲大師，不妨問一問。
余絲韻