本文重點
鴻海喺台灣一向係指標股，舊年大批外資股東為救老家大舉套現，霎時間令散戶人數驟增，唔少仲喺高位入貨。鴻海董事長郭台銘有次去士林食臭豆腐，畀股東認到，呢位小股東猛向佢呻買貴貨，搞到郭董自覺比臭豆腐還臭。
應訴求加派股息
郭台銘尋日喺股東會上，為股價下跌而向小股東道歉。鴻海股價由200幾蚊（新台幣‧下同）一度跌到60幾蚊，郭董話外資沽貨，散戶由過去10幾萬人增至30幾萬人，顯示好多人「坐緊艇」。佢話小股東多咗，「我了解我嘅責任更重嘞」！公司上年賺少咗，派息派股創10年新低。面對小股東要求加碼，郭董立即召開臨時董事會，仲通過每股多加37%股息。
下月將榮任第三任父親嘅郭董透露，已經有8個月無跳過舞，依家佢已經恢復每日工作16個鐘，就算周末打一次高爾夫，都同時開埋會。郭董話睇到有80幾歲高齡散戶到場，為咗佢哋，一定會繼續打拚。佢仲拍心口保證，「再過一段時間，股息就會恢復以前嘅水平」。
余絲韻