本文重點
「股神」巴菲特入股比亞迪（01211）單交易延咗期，原來巴菲特睇得起比亞迪，全賴佢嘅左右手Munger，極之欣賞佢哋位行政總裁王傳福，仲形容王傳福係大發明家愛迪生及通用電氣前主席Jack Welch嘅混合體！
拍檔勁讚王傳福
Munger話王傳福一方面有愛迪生解決技術問題嘅能力，另方面又有Welch達成目標的能力，仲話自己未遇過咁樣嘅人。
巴菲特向來嘅投資哲學係唔熟唔做，只會投資一門連蠢才都能經營嘅業務，而唔會入股一門佢唔明白嘅生意，所以去年當股神旗艦巴郡投資內地電動車及電池公司比亞迪時，大家都以為股神採用咗投資第三條，即係入股唔明白嘅生意，原來真正嘅「投資對象」係王傳福。
巴菲特話八十五歲嘅Munger對任何投資意見瞭如指掌，加上巴菲特旗下公用公司「中美能源」主席David Sokol親到中國睇過比亞迪，亦令股神放心，股神話自己唔知電動車點樣開動，但兩位合作夥伴係高手，既然佢哋明白比亞迪盤生意點Run，故自己亦打破投資規則。
余絲韻