本文重點
東亞銀行（00023）過去一年負面消息多多，唔單只業績表現差，公司管治水平更加得人驚，小股東有乜辦法唔把幾火，於是趁尋日股東大會咁好機會，揶揄佢哋派得嗰兩仙息咁「多謝」，仲提出管理層應該減人工謝罪。其他小股東齊聲叫好，仲大力咁拍手掌和應，如果呢個係正式議案，睇怕百分百股東贊成。
一味講「多謝」「對唔住」
面對群情洶湧嘅小股東，○八年度收3,350萬元總薪酬嘅主席李國寶梗係呆晒，講得最多係「多謝」同「對唔住」，話舊年營業做得唔理想，唔可以派咁多息，希望今年做好啲，可派番多啲。
「做錯嘢應該減人工」
呢啲咁「行」嘅答覆，股東聽完當然不滿，輪流炮轟，話佢哋賣咗咁多雷曼迷債，應該賺咗好多錢至係。又有股東話：「派紅股係累我哋呀，畀兩個仙都多謝你，做錯嘢應該懲罰自己先，要減人工先對得住我哋！」
小股東條氣仲頂住之際，李國寶話收到一位股東書面通知，有意選一個叫郭兆文嘅人做獨立非執董，於是喺會上審議並酌情通過，但佢都未問有冇股東和議，就有股東好識趣咁話要發問，話要知清楚郭生乜嘢背景。
一問之下，佢竟然好坦白咁話根本唔知呢位仁兄嘅背景，堂堂一個上市銀行主席，竟然咁樣答，你話係咪離譜！公司秘書解畫時亦解釋得極其混亂，仲提醒大家話唔係董事會提出㗎，大家係可以投反對票！結果點？當然係好大比數否決咗呢個議案啦！
所以話唔好以為小股東好蝦，若管理層唔畀心機做，小股東唔會放過你哋㗎！
余絲韻