隔晚道指重上八千點，昨日早段港股一度升逾300點，恒指逼近萬六關，不過受內地經濟數據欠佳影響，未能持續升勢，倒跌86點收市，報收15,582點。古晨唔估底，又唔估頂，所以尋日係咪見頂回落，小弟不予置評。不過個別股份仲未死得，只要大勢未轉弱，股照炒，錢照搵。
首長寶佳（00103）日前公布業績，雖然純利同比倒退67%，但仍有三千幾萬落袋，有錢賺好過要蝕錢。寶佳賺少咁多，主因係去年第四季起，客戶需求下跌，加上原材料及商品價格暴跌，令旗下多個業務的存貨值要作大幅撥備。去年金融海嘯，公司唔使蝕錢算係咁，而且其股價相對亦係從事生產鋼簾線及鋼材加工貿易的興達國際（01899）落後幾條街，最近大市狂升，寶佳都跟唔上。寶佳由高位1.58元回落，現價不過三毫幾，要追落後仲有大把上升空間，短線先試0.5元，跌穿0.3元止蝕。
古晨