尋日朝起身見到隻鎊喺1.50樓上，於是唔理三七廿一平咗張前晚喺1.4947揸嘅鎊，揸呢張鎊主要見到佢喺波幅1.4820至1.5039調整嘅一半，見隻鎊由高位回落，睇咗一陣，跟住美國公布三月消費物價指數，結果差過市場預期，個市又係咁，外幣唔跟美國數據差跌落去，所以先決定喺呢啲位揸番隻鎊。
講番前日，雖然隻鎊全日波幅只係得二百幾點，但真係好好炒，好似我咁，喺1.4867揸鎊，跟手喺歐洲開市後衝上1.50之後平倉，結果佢衝到1.5039先肯停，不過，每次都係咁㗎喇，第一次試衝都會有一定幅度嘅回調，所以喺1.5017沽番轉頭，跟住喺1.4966平倉，就咁執咗二百幾點。匯市就係咁，我本身就比較鍾意啄吓啄吓咁賺，主要識得個Friend係做經紀嘅，佢話做匯市莊家嘅最怕就係啲客啄完就走，因為無仇報，好多客唔係好似我咁雞仔注，係講緊幾球咁做，咁嘅注碼執十幾點已經好和味。
珍妮花