隨着祖國魚缸因為經濟數據未如理想而腳軟，東瀛魚缸升幅收窄，本地魚缸在高位反覆回落，最低見15,517點，散場報收15,582點，跌86點。國企指數更跌1.7%，報收9,141點，跌164點，跑輸魚缸。現貨場成交額增至746億元，保持活躍，難怪一眾證券行股昨日逆市上升。
藍色大隻佬個別發展，思捷（00330）易帥，公布委任新行政總裁後，股價反彈近5%。大波鞋（00551）升近一成，表現一枝獨秀。重量級祖國移動（00941）昨日繼續發力，盤中曾見過75.7元，低位73元曾輕微倒跌，散場報收74.15元，升1.3%。古勝講過好友要再挾淡倉，下一個接力大隻佬一定係祖移，祖移呢兩日先叫扭轉弱勢，升勢有餘未盡，股價可挑戰83元，屆時魚缸都要見16,200點樓上。大笨象（00005）反覆做好，微升0.4%，報收55.25元。
好友或再施回馬槍
「油魔」又唔精神，石油股後勁不繼，先升後跌，中海油（00883）跌3.2%，中石化（00386）跟中石油（00857）分別跌1%及2.2%。昨日魚缸挑戰萬六不果，唔少缸邊友都樂於做淡友，皆因本地魚缸由上月底位回升，累積升咗超過4,000點，在下認為估頂無謂，尤其昨日唔排除好友在萬六點前先詐死，扭一扭計，引埋淡友落疊，好友或施回馬槍，情況好似衝破萬五關之前一樣。
古勝咁諗有理由支持，皆因昨日幾件公用股受壓，若然後市要跌，公用股無理由唔成為避險工具。加上好友辛苦經營，又點會喺月底結算前輕易放過淡友，即使萬六未能突破，短期大跌機會較低，似乎加入淡友行列會太早。
紅色分子個別發展，昨日仍有落後紅色分子逆市做好，中國南車（01766）昨日升6.3%，報收3.69元，走勢突破，成交顯著增加配合升勢，料新一輪升浪展開。集團將於下周三派成績表，由於南車舊年八月先上市，招股書預期盈利唔少過13.6億元人仔，斷估公布結果跟預期唔會有太大出入。
國策下定單有保證
由於北大人已訂下五年優化全國鐵路及鐵路網絡大計，南車的鐵路車廂定單持續增加，尤其在動車組方面的定單增長較快，而鐵路部料逐步增加國產動車組之需求，對集團中長線發展有利。中國南車的業務，有一定的市場優勢，加上技術和監管門檻較高，同業競爭有限，而其盈利能力亦遠高於同類企業，所以其估值有一定溢價實合理。
睇番呢個幾月，國指升幅超過一成半，但南車股價卻未見起色，昨日雖顯著上升6.3%，但仍低於今個月內高位3.74元。缸邊友唔炒南車，主要係預期業績無驚喜，不過，古勝認為祖國鐵路網絡快速擴展，機車需求上升是必然趨勢，南車業務前景可睇高一線。至於昨日走勢出現突破，相信南車係時候追落後。
古勝