本文重點
居屋一向都有大批用家捧場，Vincent發覺近排喺拍賣會賣出嘅居屋單位特別多，聽黃開基拍賣行嘅老友講，尋日舉行嘅拍賣會就賣出屯門居屋富健花園一個高層銀主盤，成交價比開價高超過31.3%。
賣出嘅富健花園10座高層A室，開價80萬元，最終喺自由市場以105萬元成交，呎價1,511元。
Vincent仲知道，同場賣出咗兩個住宅單位，成交價都遠遠高過開價，其中屯門大興花園1期3座低層A室，賣咗77萬元，高開價32.8%。旺角五寶大廈高層D室售120萬元，高開價33.3%。但之前有好多買家表示有興趣嘅鰂魚涌太古城寶山閣低層銀主盤就賣唔出。
美聯中國推「網絡經紀人」
上網睇資訊相信係唔少人每日必做嘅事，美聯中國近期就推出「網絡經紀人」服務。該公司區域董事（深圳區）王書權話，「網絡經紀人」其實係一個平台，今次版面融合咗美聯地圖同大量數據資料而成，希望可以提供更全面嘅資訊畀客戶。由於此類服務已成大勢所趨，所以未來仲會繼續投放資源發展。
至於美聯物業亦趁樓市小陽春大搞宣傳，好似今個月中就贊助五大電子傳媒播放天氣預測。
（Vincent Lau）