本文重點
AIG家下自身難保要減贊助，所以就快同英超球隊曼聯講bye bye。喺歐美缺水咁嘅時勢之下，紅魔鬼都將目光轉向亞洲，而其中一個可能嘅贊助商就係香港上市嘅研祥智能（08285）啦！
尋日絲絲同研祥智能主席陳志列飯局，講起呢件事，陳生證實同曼聯嘅中國代理係傾過，人哋仲送咗件繡咗陳生個名嘅曼聯球衣畀佢添。不過佢就話一切都仲傾緊，依家想低調啲，唔肯透露多啲進展。
咁因乜事做開高端自動化智能業務嘅研祥會有興趣贊助紅魔鬼呢？難道陳生係fans？佢即刻否認，話自己雖然有睇波，但生意還生意，若然因為係fans先贊助咁就有失公正啦！
做生意盼3倍回報
絲絲翻查過資料，據報道，AIG之前同曼聯簽咗四年約，贊助金額高達5,000幾萬英鎊㗎！貴還貴，不過曼聯嘅贊助仲係好多人爭，聽講沙特、卡塔爾等地嘅四家亞洲公司都有興趣。陳生就話，若然有一日見到研祥個名喺紅魔鬼球衣出現，咁自己一定發咗達，因為自己做生意不嬲都希望有三倍回報。
余絲韻