MIRROR唱將 新歌搶點擊 Jer樂壇站穩腳 瞄準男歌手獎
人氣男團MIRROR實力唱將Jer（柳應廷）出新歌搶點擊，借用「宿命」談母子之間的爭執及仇恨，因選材獨具一格，他自爆出歌首日有「潛」入群組睇Fans反應。出道橫掃樂壇多個新人獎的他，直言接下來會向男歌手獎進發！
Jer之「重生系列」二部曲《砂之器》登場，講述之前《狂人日記》的反叛對身邊人產生傷害，新歌由親情出發，帶出如何修補破裂關係。MV推出短短數日已突破55萬次收看次數，昨日他接受專訪時表示喜出望外：「估唔到大家聽完首歌有共鳴。（擔心題材太深奧啲Fans難明？）唔擔心，廣東歌詞得意在可以好深，又可以好淺白咁表達，我只係選擇咗個深角度，有Fans分析得好勁，搵到7、8成嘅隱藏位。」
姜濤爆轉會驚魂
每次出歌都能為Fans帶來新鮮感，Jer自爆背後其實會因別人期望過高而感壓力：「花好多時間、心機造歌，唔知大家聽完有咩反應，今次首播嗰陣我有入群組睇大家嘅留言，好彩大家都鍾意，放下心頭大石！」出道短短兩年多已站穩樂壇一席位、獲獎無數，他不諱言視男歌手獎為終極目標：「我諗每個歌手都想拎呢個獎，但目前覺得由作品表達我想帶出嘅訊息重要啲。」
另外，其MIRROR隊友人氣王姜濤跟內地足球員撞名，對方宣布轉會過檔消息，嚇窒一班「姜糖」，以為偶像要拆夥，幸而只是虛驚一場！