荷里活巨星湯告魯斯（Tom Cruise）上月被傳確診新冠肺炎，消息傳出後他一直未有回應。不過外國傳媒指本月3日59歲生日的他，邀請好友一同睇波慶生，莫非中招之說屬流料？
據知靚佬湯生日當天邀請幾位好友到他位於英國Biggin Hill的新居一同睇歐國盃英格蘭大戰烏克蘭賽事，熱捧英格蘭的他最後見證愛隊贏波殺入4強。
查實靚佬湯向來熱愛足球，年少時曾加入學校足球隊之外，他亦多次被拍得到球場睇波。其中2012年，他到英國曼徹斯特宣傳電影《烈探狙擊》（Jack Reacher）時，亦專誠入場睇曼聯對曼城的打吡戰。