拍《寶寶大過天》出絕招 馬國明岑麗香湊女吵大鑊

岑麗香與馬國明在劇中經常嗌交，「激戰」連場！

2018年的《BB來了》內容寫實貼地，大獲好評，經過3年後，同一系列的《寶寶大過天》載譽歸來！但今次就換上全新演員上陣，由廖晉碩監製、馬國明、岑麗香、陳自瑤、張頴康、吳業坤、車婉婉及黃文意等合作演出。此劇將於今晚（14日）晚上8時30分在翡翠台首播，劇情講述不同家長面對的育兒難關，其中馬國明與香香為2歲多的囡囡及工作問題不斷發生矛盾，最後帶出有快樂的父母才有快樂的孩子的主旨，希望讓觀眾睇得輕鬆開心及有共鳴！

劇中除了馬國明及香香外，「四大長老」商天娥、吳岱融、龔慈恩及李國麟因出身背景不同，對湊小朋友各有意見。現實中未婚的馬國明於劇中與2歲多小演員合作，坦言一開始都有難度，幸好小朋友很乖又可愛。以前曾湊姨甥仔的他，與小演員磨合一輪後已很有父女感覺，有時更會使出絕招氹對方：「呢個BB女好鍾意玩『飛機』，2隻手抱到佢好高，佢就好開心，所以拍時見佢開始眼瞓就會抱佢飛上天，佢就會開心笑番醒。」提到再與香香合作，他笑言之前合作時對方是追不到的女神，今次終於追到更做埋太太，又指與她有很多吵架場口，覺得對中文不太好的香香較吃力，她回家還要湊仔，相當厲害。

兩人氹掂「囡囡」建立「親子情」，拍出一家三口的天倫樂。	商天娥、龔慈恩	商天娥、龔慈恩、吳岱融及李國麟演活「四大長老」湊孫各師各法。

同小演員合作有難度

香香現時身為2子之母，但笑言與小演員合作有難度：「要對佢好有耐性，要時間培養感情，有時小朋友讀劇本唔易，我哋會做一次畀佢睇，佢就會做到，但如果真係唔Work嘅話，只要出動『黃金絕招』乾果零食就會OK。」說到再與馬國明合作，她大讚對方是很好的拍檔，又笑言今次演夫妻不但不Sweet，反而有很多吵架戲：「我哋好多時排戲都排到好攰，因為要用好多Energy，由頭嗌到落尾咁！記得有場嗌交戲喺室外拍，嗰陣就嚟落雨，所以要好快拍完，但可能已經嗌到好熟，所以1、2頁紙對白嘅嗌交戲，中文係有限公司嘅我竟然都可以一Shot過！」