由荷里活男星湯告魯斯（Tom Cruise）主演的《職業特工隊7》（Mission：Impossible 7），開拍以來多災多難，近日有傳拍攝現場再爆疫，更有多達14名工作人員中招，導致緊急停拍兩星期！
據知靚佬湯日前在英國拍攝一場夜店戲，事後4名女舞蹈員及10名工作人員共14人確診新冠肺炎，由於靚佬湯開工時，與他們只有幾米距離，他與同場所有60名劇組人員均被列作緊密接觸者，由6月1日開始強制隔離兩星期。消息人士向英國傳媒爆料：「湯告魯斯嬲到震，尤其因為佢去年已經鬧過員工。今次對整個拍攝影響好大，佢哋復工時又要再次追趕進度。14個工作人員中招，大部分係湯告魯斯助手！」
今次已非《職工7》首度出現員工大規模染疫，去年底，劇組內被爆有至少12人染疫，導致停工5個月。為免拍攝進度再度受阻，復工後，身兼監製及主角的靚佬湯十分注重防疫，除了斥資500萬港元租郵輪用作劇組人員在挪威拍攝時的住宿外，他在片場亦「罩不離口」，就連與Fans合照都堅持戴口罩及保持社交距離。去年他更被爆在片場失控，鬧爆沒有保持社交距離的工作人員，導致5人頂唔住壓力劈炮。如今拍攝再因「爆疫」受阻，相信靚佬湯又會大受打擊！