娛美人：宅男女神最愛是誰？ 譚旻萱搵「阿強」陪跑 撇甩坦克身形
「宅男女神」模特兒譚旻萱（Mandy）外表清純、身材高挑，但原來中學時期擁77kg的「坦克」身形，靠運動減磅但又「復肥」，最後得「阿強」支持才重拾苗條身材，難怪她直指「阿強」重要過男友！
令宅男羨慕又妒忌的「阿強」，原來是半歲大的八哥犬，她自爆愛犬名字源於電影《少林足球》：「其中一幕田啟文打電話畀阿珍，結果阿強接電話。嗰時我搵緊狗，見到佢就覺得好適合呢個名，屋企仲有一隻4個月大嘅阿珍。」並笑言若再養狗，會取名「田雞」或「阿梅」。
她特別愛錫阿強，原因是愛犬令她減肥成功。讀書時她曾過度節食，搞到又殘又攰：「健身教練話我新陳代謝好慢，好大機會係以前用唔啱嘅方法減肥，每日只食水果同雞，雖然2個月減咗10kg，但真係唔好試！」
打波成身汗 冇吸引力
她兩度靠打籃球及跳舞成功減肥，但很快又打回「圓」形：「我唔鍾意跑步，冇恆心，後來帶阿強陪跑，睇住佢個Pat Pat喺我前面跑，好得意，有佢陪跑好開心。有人話寵物係負擔，但我唔覺，佢哋令我嘅人生更完整，佢畀200％愛我。（愛狗狗多過男友？）係，愛係冇質疑。」
Mandy指其身高遺傳自父母，讀書時被推薦入籃球校隊，自言打波時衣着隨便、冇化妝兼成身汗，毫無吸引力。對於被封宅男女神，她非常感謝父母：「爹哋自細叫我不斷問自己問題，例如『點解對呢件事唔滿意』，之後就會清楚自己做錯乜！」她被經理人Cool Style從社交網發掘，當時讀中五應付考試，全家反對她入行，要她考完試才認真考慮。
Profile
生日：11月15日
身高：1米77
體重：56kg
嗜好：籃球、排球、跳舞