連詩雅期待與「情敵」合作

歌手連詩雅、泳兒（Vincy）、許靖韻、鄭欣宜以及Gin Lee等，前晚於電視城錄影《勁歌金曲》，因拍劇離港3個月的Shiga，受訪時表示30幾歲人都未試過長時間離開屋企，問到身在異地最掛念誰？她先賣口乖指是傳媒，再說是屋企人、愛犬，那麼男友陳家樂呢？她即「抵死」地以愛犬扯開話題，「投訴」狗仔忘了她：「佢依家黐媽咪多啲，我有少少唔開心，其實都有擔心過佢一見到我會吠，好彩冇！（有同家樂視像？）我同好多人都有視像，例如黃翠如同YoYo（陳自瑤）。（『520』你都同佢哋過？）佢哋對我都好重要，其實自己都唔記得呢個日子。」

講到有傳她與陳家樂冷戰中，Shiga坦言不想再回應感情事：「希望大家專注我嘅工作。（男友出活動有講你哋好穩定、生活愉快。）我都生活愉快，多謝大家關心！」再提到早前有傳港姐黃嘉雯介入，她表示認識對方：「嗰陣選港姐係我揀佢做冠軍，希望遲啲有機會合作。」

泳兒唔擔心有咗

同場的泳兒身體近日頻傳「警號」，低調入院之餘又被撞破排隊睇中醫，她受訪時表示現況很好，入院期間照了胃及腸，其中以照腸最為辛苦，因為事前要飲瀉藥，記者打趣問是否有喜？Vincy笑說身邊同事有恭喜她：「我話想嘔嗰陣嚟恭喜我，不過，我又真係唯獨冇Check呢樣，但安全嘅！（男友都有諗過你有咗？）佢可能會擔心，哈哈！但係佢送我入院嘅。」