岑麗香花式餵奶雙倍愛
岑麗香（香香）昨日在社交網上載相片公布細仔Julius已平安出世，相中的她左右開弓同時餵兩子飲奶，如玩花式，笑言是雙倍困難，雙倍的愛。為免大仔呷醋，香香更代細仔送禮物給哥哥，令兩兄弟相親相愛。
於2019年為老公強強誕下1子的藝人岑麗香，今年2月宣布懷有第2胎，昨日香香在社交網晒出餵母乳照片，宣布B仔「小腰果」已經出世，成功三年抱兩，可喜可賀！相中香香一手抱住細仔餵人奶，另一隻手就拿着一個奶樽餵大仔Jacob，場面溫馨，她寫道：「Double trouble, double love（雙倍困難，雙倍愛）#小腰果多多指教」剛剛出世不久的小腰果頭髮濃密，非常可愛，Jacob就睡在細佬身旁，相處融洽。
BB用爺爺名字
而強強亦上載了幾張靚相，再做爸爸的他開心得高舉細仔，並透露囝囝英文名叫Julius Samuel Ngo，沿用了爺爺名字，又指勞苦功高的香香身體復原得很快。
香香接受本報訪問時難掩喜悅，不時甜笑，她感謝大家的祝福，並說：「可以叫BB做『BabyJuJu』，容易啲講，佢出世時係3.02kg，所以OK吖！大家都平安，多謝大家關心，哥哥（大仔）好開心，因為我哋一早準備咗份禮物係細佬畀哥哥，哥哥一直好想要一盒顏色筆，我哋話係細佬送，所以佢好滿意呢個細佬。」
香香的好友王君馨亦表現雀躍，她接受訪問時說：「我哋知道呀，戥佢好開心！我諗等佢坐完月先搵佢，依家疫情比較危險，我哋成日出去工作，所以都想保護番佢！」