胡鴻鈞遇衰神 任陳嘉慧糟質
胡鴻鈞昨日拍攝一場被陳嘉慧大力推的戲份，他事後指對方平時可能做開Gym，勁力十足，笑言收工要睇跌打；之後他亦拍了一場孭住羅蘭行樓梯的戲，坦言有壓力，希望拍時可給前輩一份安全感。
藝人胡鴻鈞（Hubert）、陳嘉慧（Erica）昨日於鰂魚涌一座舊樓內拍攝新劇《愛上我的衰神》，劇情講述Hubert送外賣時遇上一位小朋友，期間被「衰神」Erica整蠱。仍屬新人的Erica受訪時表示開工10數天，過程相當開心，問Hubert有否整蠱她？她得戚說：「係我整蠱佢先啱，劇情講我哋係唔同空間嘅人，佢有時睇我唔到，所以好多我整蠱佢嘅場口，有一場要我潑佢奶茶，事後係咁同佢講對唔住。」
人肉CD機跟身
Erica又指劇中最幸福的是自己，因現時天氣炎熱，Hubert仍要穿着厚厚的外賣制服拍攝，而馬貫東更要穿冷衫，相當辛苦。她透露演的是悲劇人物，當中亦有多場沉重喊戲：「一開頭都好緊張，但同導演、監製傾完，佢哋都叫我盡量放鬆心情。（點令自己投入感情？）聽吓歌囉！（Hubert即場唱畀你聽？）佢喺隔籬就好似開緊免費演唱會咁，我就好似有部人肉CD機跟住。」
說到有沒有指點一下後輩時，Hubert即謙虛說：「嘩！我何德何能呀！自己都搞唔掂，完咗《十月初五的月光》冇耐就開拍，中間要宣傳歌曲冇乜時間休息，依家年紀大，恢復唔到，嚟緊又要做新歌。（唔夠專心？）我會嘗試攞個平衡，自己又貪心，想兼顧唱歌同埋拍戲。」
畀羅蘭安全感
到晚上Hubert拍攝一場孭着羅蘭行樓梯的戲份，坦言有壓力：「我唔係驚孭佢唔起，但孭老人家真係要小心啲，希望可以畀到安全感羅蘭姐！」