吳天兒追娛圈夢 放棄做「旅」神

現年25歲的吳天兒(Tiffany),15歲隻身赴英國讀書,並於華威大學畢業,主修商業管理課程。返港後,她希望擴闊視野,2018年獲黎瑞恩提名參選香港小姐,雖然20強止步,但之後投考無綫藝員訓練班,正式加入娛樂圈。

Tiffany與黎瑞恩一樣人美心善,曾花一年時間到泰國山區義教小朋友英文,曬得一身古銅色膚色,更學了不少泰文。外表斯文的她原來文武雙全,精通排球、田徑、騎馬及劍擊外,又懂得彈鋼琴、古箏、小提琴及芭蕾舞。英國讀書時,每逢長假她便獨自孭背囊周遊列國,至今已去過52個國家。身為基督徒的她坦言,最想去約旦。

險遇恐襲

Tiffany表示:「通常長假期我唔會返香港,歐洲又近又平,火車、巴士又方便,我就孭住背囊周圍去。(屋企人唔擔心?)有時瞞住媽咪,歐洲都唔係好危險,係試過一次喺斯里蘭卡,有恐怖分子喺首都進行恐怖襲擊,周圍放置炸彈,我媽咪同朋友見到新聞好擔心,好在當時我未去到首都,最終要改行程,嗰次真係好驚,心諗仲有好多嘢未做,唔想冇咗條命,事後好感恩!」

已玩夠的她笑言現在要「還債」,專心努力工作。談到若當年入圍港姐,演藝路可能較順利,她說:「可能知名度、角色都有分別,初頭係有少少失落,但係我入咗訓練班都好開心,一班人上堂,學到好多嘢、好充實。」她坦言視佘詩曼為偶像,希望有幸跟對方合作。

Profile

身高:1米66

體重:50.5kg

嗜好:看書、旅遊、做運動

作品:《愛.回家之開心速遞》、《換命真相》等。