陳展鵬出賣夫妻情趣 老婆藐爆

視帝陳展鵬在新劇與林夏薇奉旨親熱,昨日他出席宣傳活動時自爆「抄橋」,將夫妻間平日的情趣事加入角色中。雖然被太太單文柔發現兼藐爆,幸好他以鬍鬚造型俘虜太太,奪回分數!

陳展鵬、黃智賢(Ben)、馮盈盈及劉佩玥(Moon)等昨日出席無綫新劇《逆天奇案》宣傳活動,監製劉家豪宣布該劇首集7天跨平台總收視27.6點,暫時成為本年度首集最高收視,亦是兩線劇集首集收視冠軍,高層杜之克都有現身活動打氣。

留鬚難為囡囡

劇集成績理想,展鵬與Ben相當興奮,表示已在群組約飯敍。問到太太單文柔可有捧場?展鵬笑說:「OK,佢鍾意我啲鬚。(有冇避開,唔睇你同林夏薇啲甜蜜戲?)有啲橋段係抄番嚟,平時我會同太太撩交打嘅,係情趣!(太太有冇發現似曾相識?)佢蔑視我囉,仲話咁熟嘅!嚟緊都有,係甜蜜同開心。」雖然太太冧爆其留鬚造型,女兒「小豬比」卻不太受落:「真係手掌、手背都係肉,拍攝幾個月冇錫到個女,好大犧牲。最近都留番少少鬚,惟有朝早錫個女,夜晚啲鬚生番出嚟就錫太太。」

至於盈盈在《好聲好戲》勝出首個回合,在節目擔任「星級打氣團」的Moon直言比賽過程中戥盈盈緊張,見證對方付出的努力,所以對她特別偏心。

馮盈盈參賽超緊張

盈盈坦言參賽以來壓力大:「雖然勝出第一回合入決賽,但預計會繼續緊張。其實入行5年嚟落咗好多苦功,搵老師教演戲,好努力練習,有錯嘅又會即刻糾正,呢啲唔係短短3個月可以做到嘅事。」而Moon被問到稍後會否參賽?她預告會以特別嘉賓身份參與聲演:「突然間被評分真係嚇死,仲要接受評語,嗰刻實在太緊張。」