港姐復辦準決賽 密謀星洲拍外景

曾志偉與多位歷屆港姐出席啟動儀式。

今年9月舉行的香港小姐競選昨日於將軍澳電視城以「WE MISS HONG KONG」為招募主題，展開全球招募。無綫副總經理曾志偉聯同慧妍雅集代表包括曹敏莉、楊思琦、歷屆港姐馮盈盈、劉佩玥等進行啟動儀式。

曾志偉稱今年應該不會擔任港姐司儀，但對新一屆港姐則構思多多，他說：「會有番準決賽，決賽希望首選紅館，睇吓有冇期。最重要係將港姐『美貌與智慧』攞番出嚟，所以搵咗慧妍雅集擔任顧問做1對1嘅導師，希望將港姐親善大使、服務社會嘅形象展現出嚟，並唔係只係為咗入娛樂圈。（疫情下海外佳麗來港困難？）所以提早咗招募，希望佢哋有充足時間回港。（港姐拍選美題材劇？）選美之後進行，佳麗唔會喺劇中出現，只係會用港姐舞台拍攝，慳番啲場景錢嘛。」他又希望港姐能出埠拍攝外景，與港有旅遊氣泡計劃的新加坡也是考慮之列，但不會強迫佳麗接種疫苗。

馮盈盈性感上陣，講明唔係為搶鏡！

曹敏莉（左）與楊思琦現身撐場。

楊思琦讚港姐導師有創意

馮盈盈以低胸露背裙示人，自言並不是為了搶鏡，她笑說：「其實係有層紗，唔係想像中咁性感，只係想高貴啲，配合番港姐主題。（推薦靚女參選？）黃嘉雯參選前有問我意見，之後仲攞到冠軍，我係真人真事推薦成功嘅例子。」而慧妍雅集信託委員會主席曹敏莉指今年會全力支持港姐競選，楊思琦則覺得港姐導師相當有創意，若當年參選時有導師協助，會更有安全感。