湯洛雯自爆 拍拖後零咀戲
湯洛雯自爆跟馬國明相戀後，已沒有拍過咀戲，即使新劇跟馬德鐘飾演舊情人，亦沒有親熱場口，但她否認被男友限制，又大爆對方秒睇她的「激情傑作」！
無綫新劇《雙生陌生人》昨日進行拜神儀式，馬德鐘、湯洛雯（靚湯）、陳煒、何廣沛等齊齊現身。靚湯受訪時表示，跟一人分飾兩角的馬德鐘有超多對手戲，並說：「佢係並列男一，佢嘅其中一個角色係我初戀情人，但不辭而別，之後嚟咗農莊搵我想翻撻。」馬德鐘即笑住澄清劇中有老婆陳煒，故重遇初戀都只是想補償對方。
靚湯之後主動提到2人暫時未有親熱戲，問是否男友馬國明拒開綠燈？她笑住否認：「如果劇情需要都會拍，佢一定唔會唔畀，公司啲尺度唔大得去邊，我亦冇要求佢唔拍，但自從拍拖之後，都真係冇拍過錫戲，上次同譚俊彥嗰段（劇集《失憶24小時》）激情戲，拍嗰陣都未拍拖，但佢（馬國明）9秒9睇咗。」
講到即將34歲生日，男友剛好已拍畢《白色強人II》回港，問到會如何慶祝？她透露會香港一日遊：「嗰日暫時可以放假，想去行吓山、去主題樂園同Staycation。（男友返港陪你更開心？）佢去內地拍劇嗰陣我哋有視像，唔似以前爸爸嗰個年代淨係可以打長途電話。（依家摸到個人喎！）我哋呢啲係靈魂交流。（神交？）係呀，哈哈！」
何廣沛想享齊人之福
而有不少戲份的郭柏妍，飾演見習律師，她表示因戲份暴增而感到緊張，私下密密做功課，笑言早前晚晚重溫《律政強人》作參考。講到她劇中跟何廣沛及蔣家旻發展三角戀，問到有否親熱場口？她怕醜表示劇本未寫到，但自言可拋開港姐包袱：「只要角色需要我可以接受，相信唔會太過火，就算要我唔化妝出鏡都得！」
至於何廣沛最後情歸於誰？他大賣關子，問到想揀邊個時，他即抵死笑說：「我唔會揀，2個都會要。（享齊人之福？）梗係啦！2個都咁好！點解要揀？（咁想同邊個有親熱戲？）要過數（畀錢）畀編審先！（咁講唔怕緋聞女友朱晨麗嬲？）又關佢事？做嘢啫！」笑問現實中是否都想揀2個女友？他開玩笑說：「唔好將真嘢講出嚟！心入面想，但實際係冇！」