涉抄韓唱片封套 林奕匡認衰：以後會小心
唱作歌手林奕匡（Phil）年初推出新歌《時間的囚犯》，被揭懷疑抄襲韓國歌手Zico於3年前發行的專輯《THINKING》封面，兩者同樣走灰黑Tone，2人都是坐在中央凝望牆上反射的自己，設計相似度達9成！
記者聯絡上Phil，他語氣沉重地說：「影呢個封面嘅時候，我冇見過Zico個封面，所以唔知會咁相似，直至2個星期前有人留言話畀我聽，先知有呢件事。」並語帶責備說：「我一知道即刻同公司、團隊講，我哋真係唔可以有啲咁嘅事發生，無論係有意、無意都好，我哋會加倍小心。（點補救？）以後會小心處理，加倍留意，亦會同創作團隊溝通多啲。」
