無綫藝訓班變真人騷 曾志偉：似《全民造星》

無綫副總經理曾志偉、首席創意官王祖藍、助理總經理曾勵珍與樂易玲、訓練班校長馬浚偉等，昨日在將軍澳電視城出席《2021藝員及電視製作人員訓練班面試》，約有1,800人遞交報名表，首輪面試約1,200人參與。

「門檻唔係咁高」

志偉表示歡迎大家加入無綫大家庭：「今年係特別嘅一年，喺祖藍嘅創意下，正構思將今年藝員訓練班變成好似《全民造星》嘅真人騷，訓練班學員變成演員，培訓過程呈現喺觀眾眼前。」他自嘲與祖藍也能成為藝人，故不一定只揀靚仔靚女，最重要是熱愛演戲：「努力係必需嘅，如果唔勤力，縱使充滿藝術細胞，機會都會流失。」祖藍接着說：「我咁都捱到今日，所以門檻唔係咁高。」

提到跟ViuTV的《全民造星Ⅳ》撞到正，樂易玲表示：「其實我哋上年已經有咁嘅計劃，不過祖藍當時比較忙，佢返嚟就即刻同佢提議，其實TVB造星已經造咗50幾年。」祖藍亦說：「籌備中，大家會有啲唔同，TVB訓練班歷史悠久，亦係TVB獨有嘅文化。」而曾勵珍強調訓練班不是為了做騷，目的令學員能夠長遠發展。馬浚偉則指公司投放了很多資源，盼學員珍惜：「希望大家學習認真、虛心、唔好遲到，呢個係我恩師珍姐教嘅。」

蔡國威做學員？

另外，蔡國威於社交網上載「2021藝員訓練班」首輪面試邀請函，自稱會去面試。他受訪時笑言：「因為之前我以為公司有配音班，覺得呢樣嘢好專業，我之前喺舊公司都做過，希望撈多瓣，所以報咗，但原來係訓練班裏面嘅其中一part。我本來話取消，但公司叫我照去，咁我咪去試囉，覺得幾搞笑！」