「金城安」周嘉洛於前晚播出的無綫節目《大整蠱》成為被玩對象，製作組與處境劇《愛．回家之開心速遞》眾演員夾埋「交戲」，先安排嘉洛與蘇韻姿於錄影廠練舞，期間他突然被召與高層曾勵珍會面，沒料折返時發現蘇韻姿發生意外成地血，還躺在擔架床上狂喊：「我隻腳郁唔到！」同劇的呂慧儀、湯盈盈、滕麗名則配合地哭泣，相當逼真。
嘉洛撲到蘇韻姿身邊安撫，單立文（豹哥）卻不留情鬧爆他：「你走咗去邊，冇睇住佢o架咩！」內疚又自責的嘉洛谷到爆，扯開口罩反擊：「收聲呀，送走咗佢先啦！」此時蘇韻姿激動地問嘉洛會否幫她交租及照顧母親，嘉洛一臉無奈，及後女方不忍心再玩落去，惟有自爆是整蠱，嘉洛嬲到滿面通紅。
昨日嘉洛受訪時說：「因為當日蘇韻姿把喊聲太勁，我根本冇時間諗其他嘢，豹哥又係咁講嘢，當時只係覺得係咪應該處理咗傷者先，嗰下爆發，事後都覺得係情緒化咗，其實可以成熟啲處理。今次玩我冇嬲，係無奈啫！」