黃榕水着行商場陪「愛人」日光浴
性感女星黃榕的狗女「妙妙」，去年遭流浪狗咬到重傷，慘變無背肌狗，令她留下陰影。日前她帶另一愛犬「Lucky」到歡迎毛孩的商場散步，見她心情輕鬆，更剝剩比堅尼齊齊曬太陽。
黃榕飼養的2隻貴婦狗分別為3歲的妙妙和6歲的Lucky，妙妙去年12月在屋企附近山坡遭流浪狗襲擊，差點小命不保，當時在場的黃榕對保護不力深表內疚，每次諗起都想喊，自此不敢再行山放狗，寧願改行商場，感覺安全得多。
早前她便帶Lucky到淺水灣一間歡迎毛孩內進的商場，本來抱着寶貝狗的她，進入室內即放心將牠放落地，其後又抱着牠坐在大玻璃旁，當日陽光好，她索性脫下Tee，僅身穿比堅尼曬太陽，然後拖着狗狗行商場，十分寫意！
受傷狗狗要禁足
問為何未有帶妙妙同行，黃榕表示妙妙現處於「禁足」狀態：「屋企人暫時唔畀佢出街，其實佢仲有啲驚，以前去街佢會跳入袋，依家佢唔敢行入個袋度，個身會震。就算遲啲帶佢去街，都唔會再去出事地點，我都有陰影，唔想行近山坡，原來嗰度好多流浪狗出沒，係高風險地方。」
她指妙妙背部多處受傷，經過兩個月治療仍有後遺症：「佢冇咗背部肌肉，望落去正常，起碼保得住條命，始終手術有風險，醫生都有講過驚佢唔得。（自責？）我當正佢哋係愛人，寧願自己人肉擋。」她希望社會多關注流浪狗問題，覺得牠們很可憐：「佢哋肚餓，都唔想，但好殘忍。」