洪永城出鬼主意 Sell橋做監製
洪永城於TVB機會不斷，早前更「升呢」擔任劇集監製，正籌備開拍驚慄劇，為了做齣好戲，他由度故事、角色構思、分場都跟到足。至於女主角傅嘉莉則感謝洪永城把「第一次」給了她。
藝人洪永城（Tony）自拍完無綫劇集《陀槍師姐2021》後一直未開劇，原來正秘密埋頭苦幹，為即將開拍的myTV SUPER劇集《凶宅清潔師》作準備，今次除了擔任男主角外，更初嘗做監製的滋味，不過除了他之外，都有監製盧思麟傍實，而老友C君則會擔任編審，全部都是合作開的團隊，默契十足！
參與每個流程
據知，除了Tony外，今次劇中演員包括鄭俊弘、C君、傅嘉莉等。說到首次做監製，Tony受訪時說：「幕後嘅嘢我都係幫吓手啫！不過呢個唔係個劇嘅賣點，事實上我唔係精於幕後工作嘅人，今次純粹創作，度咗啲古仔出嚟公司又覺得OK，自己有參與每個角色、分場流程，至於其他嘢有專業嘅同事負責，自己都係從中學習，我同C君、盧思麟都夾咗一段時間，係有默契嘅一夥。」
逼拍檔睇鬼片
這套短劇將配合不少美術效果，而劇情方面就如外國的驚慄片，以平日的生活故事加上驚嚇情節為主，問Tony如此多「鬼」構思，是否向來都很喜歡看恐怖片？他說：「由細睇到大，你話係咪好鍾意又唔係，但肯定叻過其他兩位監製，佢哋成日都怪我逼佢哋睇鬼片，我喺呢方面係偏大膽嘅！」
傅嘉莉對於洪永城首任監製，便找她當女主角，笑謂：「估唔到佢嘅第一次畀咗我，哈哈！非常感激佢第一次監製嘅作品搵我合作，亦都恭喜佢由演員榮升做監製，好替佢開心，我當然對佢100%有信心啦，我知道佢同C君花咗很多心機同時間寫好呢份劇本，我都變得非常緊張。」