張敬軒堅守責任 開騷諗一諗

張敬軒前晚亮相繽FUN Live，網民見偶像立即抵死留言叫他「軟仔」、「乾仔」，他邊看邊笑：「好慘，全部都係男人大忌，我終於可以見番同齡人，依家冇人叫我軒仔，只係叫我軒公，就嚟可以起軒公廟！」又講笑直播前播出他出道的片段似是講「生平」，自踩昔日樣子如嚴重飢餓的人。對於有指他跟林家謙撞樣，他亦大表認同，笑起來一樣有大板牙，又讚對方唱歌好聽，笑言可成立組合「TERROR」。

惡搞也有底線

過往經常玩惡搞，最經典惡搞容祖兒扮「火龍果」，他解釋可能因為獨生子關係，自細無玩伴，一向自己同自己玩，見人開心便開心，拍片是想令大家開心，但要有底線，他說：「心地唔好就唔扮，幽默要有層次！」提到今年是他入行20周年，坦言好想開演唱會，但一切要看疫情如何，他透露去年11月演唱會，因為疫情關係，削減4成製作以控制成本。他說：「可能因為呢幾年，好多娛樂界嘅前輩，或者電台嘅朋友，好年輕就走咗，所以我依家做大型嘅演出，我係當冇下一次，即係每一次，都係當最後一次去做，所以無論公司嘅經濟條件或者自己體力方面，我都想做到最好。」

觀眾安全要緊

他認為觀眾的安全，是首要考慮條件，並感觸地說：「我記得舊年有段時間，逢下午4點幾疫情報告會，係我每一日最辛苦嘅時間，我冇諗過會喺記者會聽到我個名。我覺得作為藝人都要堅守社會責任，經歷好大考驗，無論觀眾感染咗，源頭係咪呢個騷，我都唔安樂。」