美國明尼蘇達州黑人男子賴特（Daunte Wright）日前被警方錯誤開槍後撞車身亡，事件引起多地民眾示威。美國樂壇女王麥當娜（Madonna）亦有就事件於社交網發聲，但被網民嘲虛偽兼「離地」，她即發火還擊！
62歲麥當娜前日於網上轉載賴特被警方槍殺，以及警方事後開記者會的片段，她留言表示賴特被槍殺的片段令人十分傷心，不滿警方指事件屬意外，要求美國政府加強槍械管制。有網民狙擊娜姐，指她好虛偽：「我敢打賭，你有陀槍嘅人保護你同你家人……你住喺受保護下嘅高牆背後，而唔係住喺真實世界。罪犯唔會對警察、法官或監獄感到恐懼。」
娜姐被網民的言論辣着，即時反擊：「八婆！我冇任何保安或陀槍守衞傍住。過嚟見我並當面對質，同我講我個世界究竟有幾咁唔真實……你根本對我嘅生活一無所知！我目前見到嘅唯一罪犯係獲薪水保護人民嘅警察，但警察受法官同公義制度保護，呢個簡直係笑話！因為如果你係有色人種，根本就唔會得到公義。」並指今年美國已發生逾130宗槍擊事件，之後再留言：「我哋有解決辦法，就係槍械管制！醒來吧美國！歷史只會不停重複。」
另方面，娜姐近日以1.5億港元，購下加拿大天王The Weeknd位於洛杉磯豪宅區Hidden Hills的12,547呎超級大宅，與舞蹈員男友Ahlamalik Williams築新愛巢。大宅有9間睡房，除了有主屋之外，亦設有接待客人的「客屋」，另有停車場、健身室及籃球場等，地方大得誇張！不少明星包括Drake、Kardashian成員等都住在該區，與娜姐做「左鄰右里」。